Сезоната во Шпанија беше прекината во момент кога Барселона го држеше првото место во Примера, но очајните игри во продолжение на шампионатот и победата на Реал Мадрид значеа дека по две години титулата од Каталонија оди во главниот град.
Додека сите славеа во кралскиот клуб, Меси гледаше како неговата екипа е немоќна против слабиот ривал од Памплона. Осасуна победи на Ноу Камп со 2 : 1 и тоа со играч помалку, а ниту Меси не можеше многу да помогне. Постигна гол од слободен удар, но уште еднаш покажа дека одбраната е премногу лоша за екипата која претендира на шампионска титула.
Поради тоа, по поразот Меси искажа остри зборови кои веројатно ќе го загрижат раководството на Барселона.
„Ние сме слаба екипа. Лесно нè победувате со посилен интензитет. Сè од јануари до сега беше лошо. Мораме да бидеме самокритични, почнувајќи од играчите, но и преку сите останати во клубот“, изјави разочараниот Меси. „Изгубивме многу бодови и овој меч е одраз на сезоната. Бевме неконстантни, Реал е шампион, направи сè што можеше, но и ние многу му помогнавме“, смета Меси.