Аргентинскиот фудбалер Лионел Меси летово, по истекот на договорот, ќе стане слободен играч, бидејќи не ја продолжи соработката со ПСЖ, а во моментов има неколку понуди на маса.
Footmercato пишува дека таткото на Меси веќе ја прифатил понудата на саудиски Ал Хилал и дека Меси од Саудијците ќе добие вртоглави 1,2 милијарди евра, што би бил најголемиот договор во историјата на фудбалот.
„Иако првиот избор на Меси е секогаш да се врати во Барселона, каталонскиот клуб не може да го доведе и тој се сврте кон Саудиска Арабија. Неговиот татко веќе ја прифатил понудата од Ал Хилал“, тврди новинарот Санти Ауна, кој пишува за Footmercato.
Од друга страна, Mundo Deportivo пренесува дека меѓу понудите Меси нема ниту една од Барселона бидејќи, меѓу другото, Каталонците уште го чекаат Финансискиот план во Ла Лига.
„Меси не сака и не може повеќе да чека. Не е дека не сака да го земе предвид интересот на Барса, кој недвосмислено го изразија претседателот Лапорта, потпретседателот Јусте и тренерот Чави Ернандес“, пишува Mundo.
Да потсетиме, Барселона одамна изрази желба да го врати Меси, а од клубот потенцираат дека и играчот и неговиот татко и менаџер Хорхе Меси ги знаат условите кои клубот ги нуди за неговиот потпис.
Сепак, нема формална понуда, па лесно е можно еден од најдобрите играчи на светот на сите времиња да се смести во Саудиска Арабија.
