Дали ја игра последната сезона во каталонскиот дрес или не, премногу шпекулации се вртат околу Аргентинецот. Сега, тој ја смири јавноста.
Во интервју за шпанскиот ТВ канал laSexta тој ги објасни причините за неговата разочараност изминатово лето кога дури и побара да биде пуштен да си оди во друг клуб. Но, додаде и дека сега ситуацијата е далеку посмирена во однос на неговото останување.
„Вистината е дека денес се чувствувам добро. Навистина имав многу лош период летоска. Тоа беше поради нешто што се случи претходно, пред летото. Потоа, поради начинот на кој заврши сезоната, па бурофаксот и така... Сето тоа го влечев и на почетокот од оваа сезона“, објасни Меси.
„Но, денес сум добро и сум спремен сериозно да се борам за сѐ што е пред нас. Возбуден сум. Јасно ми е дека клубот минува низ тежок период, како на клупско ниво така и поради сѐ околу Барселона. Но, јас сум подготвен“, заврши тој.
Демотивираноста кај Меси се одрази и врз неговата игра сезонава. Досега има постигнато само 6 голови во Ла Лига од кои два од белата точка, а во саботата и промаши пенал, но потоа постигна гол на одбиената топка. Во Лигата на шампионите постигна 4 голови, но дури 3 од пенал.