Лионел Меси постигна хет-трик во победата од 7:0 на Аргтентина ноќеска во пријателска против Курасао со што дојде до бројката од 102 гола во дресот со националните бои.
Аргентина одигра приајтелска со карипската репрезентација на Курасао како дел од прославата на мундијалската титула со навивачите од внатрешноста, поточно во градот Сантјаго дел Естеро, и во вистинско шоу триумфираше со високи 7:0.
Откако островјаните оддолеваа во првите дваесетина минути, „Албиселесте“ потоа одиграа фуриозно полувреме постигнувајќи 5 гола до паузата. Почна Меси во 20. минута, па следуваа голови на Николас Гонсалес (23.), Меси (33.), Енцо Фернандес (35.) и Меси (37.), што значи дека капитенот хет-трикот го постигна за 17 минути.
По паузата публиката очекуваше да види и десетка во мрежата на Курасао, но само Анхел Ди Мариа од пенал (78.) и Гонсало Монтиел (87.) успеаја да погодат.
Пред овој натпревар Меси имаше 99 гола во националниот дрес, а со денешниот хет-трик стигна до бројката од 102 гола и стана само третиот фудбалер во историјата кој стигнал до границата од 100 гола играјќи за репрезентација.
Сега пред него се пензионираниот Иранец Али Даји кој има 109 и кој се очекува наскоро да биде престигнат, додека убедливо прв е Кристијано Роналдо со 122 гола, но 38-годишниот Португалец сѐ уште игра за репрезентацијата и ги тресе противничките мрежи. Само месецов постигна 4 гола, по два во неделата кај Луксембург и претходно во четвртокот против Лихтенштајн.
Своите 102 гола Меси ги има постигнато против 37 различни репрезентации, а најомилена мрежа му е боливиската - на Боливија ѝ дал 8 гола.
