Поранешната ѕвезда на Реал Мадрид и Арсенал одлучи да замине во пензија на 34-годишна возраст.
Офанзивецот од средниот ред, кој за Германија одигра 92 натпревара и во 2014 беше дел од репрезентацијата што стана светски шампион на Мундијалот во Бразил, ги бранеше боите и на Шалке 04, Вердер, Фенербахче и Истанбул Башакшехир за време на својата 17-годишна кариера.
Озил сезонава беше под договор со клубот од Истанбул за до крајот на сезоната, но проблемите со повредите го натераа превреме да се откаже.
„По длабоко размислување, го објавувам моето пензионирање од професионалниот фудбал“, напиша денеска на својот личен профил на Twitter.
„Имав привилегија да бидам професионален фудбалер за речиси 17 години и се чувствувам екстремно благодарен за таквата шанса. Но, во последниве недели и месеци, откако се здобив со некои повреди, ми стануваше сѐ појасно и појасно дека е време да ја напуштам големата фудбалска сцена“.
„Беше неверојатно патување исполнето со незаборавни моменти и емоции. сакам да им се заблагодарам на моите клубови - Шалке 04, Вердер, Реал Мадрид, Арсенал, Фенербахче, Башакшехир и тренерите што ме поддржуваа, плус соиграчите што ми станаа пријатели. Посебна благодарност до мојата фамилија и најблиските пријатели. Тие се дел од моето патување од првиот ден и ми пружија многу љубов и поддршка, за време и на добрите и на лошите периоди. Благодарност и до моите фанови кои ми даваа љубов без разлика на околностите и за кој клуб настапував“, пишува тој.
„Сега гледам напред кон сето она што е пред мене со мојата убава сопруга Амине и моите две прекрасни ќерки Еда и Ела - но, бидете сигурно дека ќе слушате од мене од време на време на моите профили на социјалните мрежи. Се гледаме наскоро, Месут!“, заврши Озил.
