Втората половина на јануари и првата половина на февруари е последната можност за предвремени избори, смета лидерот на ВМРО-ДПМНЕ, Христијан Мицкоски, посочувајќи дека би било неодговорно наесен да има предвремени избори, да се трошат десетина милиони евра во услови на криза, за потоа да има претседателски избори во март и во април.
– Би било неодговорно така да се постапува. Затоа ценам дека ова е последниот момент, рече денеска Мицкоски, одговарајќи на новинарски прашања во Општина Кисела Вода.
Според Мицкоски, неодговорно е повеќе оваа Влада да продолжи да функционира.
– Сѐ погласно е незадоволството во рамките на пратеничките групи на партиите коишто ја поддржуваат оваа Влада. Тука пред сѐ мислам на ДУИ и на СДСМ бидејќи гледаат како државата тоне, назадува, нема реформи, нема резултати, неспособни криминални политичари ја водат таа Влада и охрабрен од тие сигнали што ги добивам од пратеничките групи на СДСМ и ДУИ, мислам дека оваа година ќе се најдат 61 пратеник коишто ќе го распуштат овој Парламент, рече Мицкоски.
Ќе одиме на предвремени парламентарни избори, нагласи тој.
– И потоа ќе дојде една влада која што ќе биде избрана од народот, народна влада, а не избрана во тесен круг на луѓе или премиер избран од тесен круг на луѓе, која што ќе работи за интересите на народот и на државата, а не за личите или партиските интереси. Така што, охрабрен од овие сигнали мислам дека имаме голема шанса тие два датума 14 или 21 мај да бидат изборни датуми и да видиме на крајот на денот ако навистина верува во тоа што го зборува Владата на ДУИ и СДСМ дека добро работат, дека се навистина успешни ќе можеме тоа да го провериме на избори, така? Народот да си каже, народот е суверен на државава. Не се функционерите на ДУИ поддржани од СДСМ суверени во оваа држава, рече тој.