Лидерот на ВМРО-ДПМНЕ, Христијан Мицкоски, изјави дека го поддржува протестот што утре е планиран во Охрид против отворањето на бугарскиот културен клуб именуван „Цар Борис III“. Повика масовно да се излезе на протест, но тој да биде мирен, демократски и без инциденти за, како што рече, „да не им се даде алиби на тие коишто се причината денес Македонија да биде во оваа ситуација“.
– Протестот е демократско право и треба да се протестира, но повикувам тој да биде мирен за да не дозволиме повторно да печалат на ваквите настани оние кои ја втурнаа Македонија во оваа ситуација, тоа е коалицијата СДСМ и ДУИ. Повикувам масовно граѓаните да излезат и да го поддржат протестот, но истовремено апелирам тој протест да биде мирен и демократски и да не дозволиме каков било инцидент да ја дефокусира јавноста од реалните проблеми, а тоа се инфлацијата, криминалот, корупцијата, енергетската, финансиската криза и уште многу други проблеми со кои Македонија денес се соочува, изјави Мицкоски по поставување камен-темелник за изградба на градинка во Општина Бутел.
Протестот е во организација на охридскиот огранок на Левица која под мотото „Не за бугарскиот Хитлер!“ ги повика Охриѓани утре од 11:30 часот на ул. „Македонски Просветители“ пред ТЦ Амам масовно да излезат и да го искажат својот антифашистички порив.
„Сплотени против империјализмот и антимакедонизмот, да го искажеме народниот револт. Смрт за фашизмот, слобода на народот!“, стои во повикот на Левица.