Македонија

Мицкоски повика на протест од Обвинителството до Врховниот суд

24. февруари 2020 - 15:54 | МИА

Скопје, 24 февруари 2020 (МИА) – Лидерот на ВМРО-ДПМНЕ, Христијан Мицкоски, на прес-конференција ги повика утре на протест членовите на партијата и сите граѓани. Протестот ќе започне во 18 часот пред Обвинителството на кејот на реката Вардар до Врховниот суд.

-Протест на кој ќе порачаме дека одговорност мора да има за неправдите и дека Заев е виновен. Порака за чуварите на неправдите на Заев, ЈО и судството: оваа држава која почива на правдата на нашата борба за независност и слобода, на почитување на правото, мора да се спротивстави на ваквото брутално кршење на законите и Уставот. Тоа е наша обврска и наша должност но и наша задача, рече Мицкоски.

Побара одговорност од поранешниот премиер и лидер на СДСМ, Зоран Заев, по вчера објавената аудио снимка на која се слуша како Заев зборува за Законот за јавно обвинителство и Врховниот суд.

Според Мицкоски, Заев јавно ја признал автентичноста на аудио снимката. Тврди, вели тој, дека бил за тоа да се спасат случаите на СЈО, но оти никој не верува дека пред осумтемина пратеници тој би говорел и би ги убедувал колку е добро тие да одговараат за случаите, кои полека ги снемува.

-Суштински аудио материјалот покажува дека Заев е виновен за неправдата и тука се клучни три работи што се откриваат. Прво, имаме јавно признание дека Заев ја злоупотребил службената должност диктирајќи одлуки на Врховен суд. Второ, тој јавно признава дека се влечат случаите и дека таа негова стратегија ја знае и СЈО и Катица Јанева која била свесна за сето тоа и трето, шемата како да паднат случаите била јасна или закон за обвинителство или „трас – трас“ одлука на Врховен суд. Значи, освен премиер бил и судија и обвинител, рече Мицкоски на прес-конференција.

Лидерот на ВМРО-ДПМНЕ обвини дека државното Обвинителство за сето ова молчи, како и сите други надлежни.

-Кога правда нема, нема ред, нема закон, има криминал. И ова не е единствениот случај Заев да е во незгодна ситуација или еден од ретките скандали за овој човек фатен како на лице место го крши законот, рече Мицкоски.

Голем број политички партии кои преговарале со ВМРО-ДПМНЕ, според Мицкоски, ги презентирале своите позиции и гледишта и во текот на оваа недлеа партијата ќе одговори на нивните позиции и гледишта.

-Коалицијата за обнова на Македонија е функционална преговараме со политичките партии што се дел од коалицијата, со оние кои сакаат да и пристапат на коалицијата, рече Мицкоски.

Имотот на ВМРО-ДПМНЕ е под хипотека, а обврските на време се сервисираат, рече лидерот на партијата Мицкоски одговарајќи на новинарско прашање за долгот на партијата, но и дали би прифатиле донации од Камчев или Мијалков на пример.

-Партијата има на нејзината веб – страница жиро сметка и секој граѓанин што цени дека треба да ја подржи ВМРО може да ја финансира. Да, апсолутно од секој граѓанин, од секој… од Заев, Камчев, Мијалков, Никола Груевски, вие, кој било што цени и сака да помогне е добредојден, одговори Мицкоски.

Изборната кампања на партијата ќе биде финансирана од членарина, од донации, но и со комерцијален кредит што партијата ќе го подигне од некоја од банките. 

Коментирај