Ако сè уште ја користите верзијата 21H2 на Windows 10, треба да се подготвите за надградба на најновата верзија на оперативниот систем следниот месец.
Microsoft автоматски ќе го ажурира софтверот на верзијата 22H2 на корисниците, дури и ако тие не сакаат, откако ќе заврши поддршката за верзијата 21H2.
На 13 јуни, кога ќе пристигне безбедносното ажурирање од јуни 2023 година, верзиите на Windows 10 21H2 Home, Pro, Pro Education и Pro Workstation ќе останат без поддршка, што значи дека ќе престанат да ги добиваат ажурирањата за заштита од безбедносни закани.
Дури и ако сакате да продолжите да го користите Windows 10 21H2, Microsoft на крајот автоматски ќе ги ажурира уредите на верзијата 22H2. Нема информации кога ќе се случи оваа надградба.
Windows 10 верзијата 22H2 исто така ќе биде финалната верзија на оперативниот систем, иако ќе продолжи да добива безбедносни ажурирања до 14 октомври 2025 година. Деловните корисници добиваат уште неколку години. Секој што сè уште ќе го користи Windows 10 по тој датум, најверојатно ќе треба да обезбеди закрпа од надворешни групи како што е 0patch.
Иако Microsoft ја форсира Windows 10 верзијата 22H2 на оние кои користат постара верзија, компанијата претпочита луѓето да ја надградат на Windows 11.
Компанијата со седиште во Редмонд престана да продава лиценци за Windows 10 Home, Pro и Workstation уште во јануари, иако тоа се однесува само на дигитални преземања на Windows 10 што корисниците ги купиле директно од страницата на Microsoft. Сè уште има многу продавници што продаваат преземања и физички копии, вклучително и OEM копии од Home и Pro достапни на Amazon, а на многу места сè уште се продаваат клучеви на производи по ниски цени.
Windows 11 добива сè поголем и поголем удел на глобалниот пазар, достигнувајќи го историски максимум од 23,01% во мај, според Statcounter. Но, Microsoft најверојатно ќе биде разочаран кога ќе види дека неговиот најнов оперативен систем паѓа далеку зад Windows 10, кој има пазарен удел од 73,46%.
