Microsoft соопшти дека ќе престане да продава лиценци за Windows 10 од 1 февруари оваа година.
Беше објавено на страниците на сите верзии на Windows 10 во Microsoft Store, каде што компанијата предупредува дека последниот ден за купување лиценци е 31 јануари.
Со други зборови, ова се однесува на сите верзии на системот Windows 10 кои се моментално достапни, вклучувајќи ги Home, Professional и Workstation.
„31 јануари 2023 година ќе биде последниот ден кога преземањата на Windows 10 ќе бидат достапни за продажба. Windows 10 ќе остане поддржан со безбедносни надградби кои помагаат да го заштитите вашиот компјутер од вируси, шпионски софтвер и друг малициозен софтвер до 14 октомври 2025 година“, велат од компанијата.
Од друга страна, купувањето лиценци (клучеви) за Windows 10 всушност сè уште ќе биде можно бидејќи лиценците сè уште ќе бидат достапни од други онлајн продавачи, што значи дека крајот на продажбата на лиценците за Windows 10 важи само за купувања во продавницата за апликации на Microsoft.
Windows 10 кој по 1 февруари би го купиле од друг продавач, ќе биде целосно функционален и целосно поддржан до 2025 година, иако може да се очекува дека ажурирањата ќе се намалуваат со текот на времето.
Microsoft вложува сè на Windows 11 и тивко работи на следната голема верзија (Windows 12?) која би можело да биде претставена за две години.
