Оние што беа во близина на патеката Силверстоун завчера можеа да го слушнат добро познатиот звук на болидот на Формула 1 со мотор V8.
Актуелниот млад возач на Хас, Мик Шумахер, возеше уште еден болид неделава, првиот во кој се натпреваруваше татко му, легендарниот Михаел Шумахер, славниот Jordan 191.
Мик дебитираше во Формула 1 годинава, 30 години откако татко му Михаел доби шанса во тимот на Еди Џордан во 1991 година, а сега болидот на Jordan го возеше за потребите на Sky Sports.
Младиот Шумахер минатата недела заврши на 18-тото место на трката во Силверстоун, а следната трка е во Унгарија и последна пред традиционалната летна пауза во Ф1 шампионатот.
Ова не е прв пат Мик да вози еден од болидите на татко му. Во 2017 година тој беше во пилотската кабина на Benetton B194, кој го возеше на патеката Спа Франкоршамп. Исто така, за време на прославата на 1000-тата трка на Ферари за време на минатогодишниот тркачки викенд, Мик го возеше Ferrari F2004 со кој татко му стана светски шампион.