Со децении наназад Бразил е фабрика за фудбалски таленти од каде европските клубови ги купуваат идните темели на нивниот состав. По неколку години пауза, Милан повторно се врати во борба за најголемите таленти во бразилскиот фудбал и денеска го официјализираше трансферот на играчот на Фламенго, Лукас Пакета.
Реал Мадрид, Ливерпул, Барселона и ПСЖ беа заинтересирани за 21-годишниот офанзивен играч за врска на Фламенго, но тој го одбра Милан и во трансфер вреден 30 милиони евра тој веќе од јануари ќе се пресели во Италија.
Лукас Пакета дебитираше за Фламенго со 19 години, по успешните настапи во младинските тимови на бразилскиот клуб. Во моментов тој има два настапи за сениорската репрезентација на Бразил, а домашните медиуми го претставуваат како најдобриот играч кој игра во бразилското првенство.
Младиот Бразилец забележа 88 настапи за Фламенго, притоа постигнувајќи 17 голови. Неговите настапи во Бразил го препорачаа кај селекторот Тите, кој го именуваше како една од 12-те замени за составот за Светското првенство во Русија.
Пакета денеска ги помина медицинските прегледи во Милано и веќе од јануари ќе се приклучи на составот на Милан.
