Неверојатно второ полувреме Интер во кое со четири голови ја анулираа предноста од 0:2 на Милан остварена во првите 45 минути.
Миланското дерби ги оправда сите очекувања. Ова беше досега убедливо најдобриот натпревар во Калчото сезонава. Дерби во вистинска смисла на зборот.
„Росонерите“ беа подобри во првото полувреме. Стефано Пиоли ја имаше одлично прочитано замислата на Антонио Конте, неговите играчи со висок пресинг не му дозволуваа на Интер да се разигра, па освен шансата на Матијас Весино и не направија ништо конкретно.
Милан доминацијата ја круниса со гол во 40. минута кога Златан Ибрахимовиќ го натскока Диего Годин и со глава му асистираше на Анте Ребиќ.
За капак на лошото полувреме на Интер се погрижи токму Ибра. При еден корнер, домашните играчи го заборавија на втора статива и непречен од никого со глава лесно го совлада Даниеле Падели. Тоа се случи во судиското надополнување.
На полувремето очигледно Конте одржал добар мотивациски говор, а ја променил и тактиката за после паузата да видиме еден друг, разигран Интер.
Со гол од волеј на капитенот Марцело Брозовиќ домаќините намалија на 1:2, а само три минути подоцна Весино се изваде за утката од првиот дел и еден отпадок го смести в гол по одлично проигрување од Алексис Санчес.
Во 70. минута „Нераѕурите“ направија комплетен пресврт. Корнерот на Антонио Кандрева го искористи дефанзивецот Стефан де Врај кој со глава од паѓање го совлада Џиџи Донарума.
Во меѓувреме Кристијан Ериксен од слободен удар од триесетина метри ја затресе пречката на Милан, додека Ибра со глава погоди статива.
Во третата минута од судиското надополнување Ромелу Лукаку ги постави конечните 4:2 откако нововлезениот Виктор Мозис одлично му нафрли.
Со оваа дерби победа Интер сега е израмнет на врвот со Јувентус со по 54 бодови, додека Лацио е трет со бод помалку откако претходно славеше минимално кај Парма.
