Баерн ја отвори новата сезона во Бундеслигата со победа на гости кај Волфсбург, беше 3:2 за Баварците.
Натпреварот во Волфсбург ќе остане запаметен и по комичната ситуација во која беше вмешан ветеранот на Баерн, Томас Милер.
Случката дојде по голот за 2:2 кога Јакуб Камињски ја испрати топката во сопствената мрежа, па тренерот на Баварците, Венсан Компани преку искусниот Милер упати инструкции до своите играчи.
Милер ги собра соиграчите околу центарот на теренот и од шорцевите извади парче хартија со упатствата на Компани.
Белгиецот на лист хартија му наложи на Јосуа Кимих да премине од средината во одбраната за да му направи простор на Милер во средината.
Тоа очигледно вроди со плод бидејќи Баерн го постигна победничкиот гол во 82. минута од натпреварот преку Серж Гнабри, кој погоди на асистенција на Хари Кејн.
