Селекторот на македонската репрезентација, Благоја Милевски, ги одреди единаесетмината фудбалери со кои ќе го започне првиот натпревар од квалификациите за пласман на Мундијалот 2026.
Македонија денеска од 15:00 част на „Рајнпарк“ стадионот во Вадуц ќе игра против домашната репрезентација на Лихтенштајн, аутсајдер во нашата квалификациска група.
Селекторот Милевски се одлучи за Столе Димитриевски помеѓу стативите, во одбраната Висар Муслиу, Никола Серафимов и Ѓоко Зајков, по крилните позиции лево Езѓан Алиоски и десно Дарко Чурлинов, во средината Елиф Елмас, Исник Алими и капитенот Енис Барди, а во нападот Александар Трајковски и Бојан Миовски. Македонските фудбалери ќе играат во третата гарнитура дресови, односно оние со црна боја во чест на загинатите од пожарот во Кочани. Прв пат во оваа боја игравме против Малта на гости во септември 2023 во квалификациите за ЕУРО 2024, кога победивме со 2:0.
Правдата ќе ја дели судиска шесторка од Украина на чело со Микола Балакин, ќе му помагаат Виктор Матјаш и Олександр Беркут, четврти судија е Денир Шурман, а во ВАР собата се Виктор Копијевскиј како главен и Олексиј Деревинскиј како помошен судија.
Директниот пренос е на МРТ3 спортскиот канал со коментар на Бранко Илиевски и Горан Милковски, кои се во Вадуц.
