Селекторот на македонската фудбалска репрезентација, Благоја Милевски, го објави списокот на повикани фудбалери за бараж натпреварот за пласман на Мундијалот во Катар против европскиот шампион Италија.
Милевски повика 27 фудбалери меѓу кои и суспендираните Елмас и Костадинов бидејќи во случај на победа над Италија тие ќе можат да играат на финалниот бараж против победникот од дуелот меѓу Португалија и Турција. Воедно, дури и Македонија да загуби од Италија, потоа секако ќе игра уште еден натпревар, пријателски, против поразениот од истиот друг дуел.
После долго време во репрезентацијата се враќа Давид Бабунски, па така сега во тимот има два пара браќа (Давид и Дориан Бабунски и Стефан и Милан Ристовски). После уште подолго време повик доби голманот Наумовски кој настапува за лидерот во 1.МФЛ, Шкупи, и кој е единствен фудбалер на списокот кој доаѓа од домашното првенство. Иако е на списокот, неизвесен е Јаховиќ кој има повреда.
Ги нема дефанзивецот Ѓоко Зајков, третиот голман Ристе Јанков, а иако се врати на терен не доби повик Илија Несторовски кој, сепак, речиси и да не добива минутажа во Удинезе.
„Што се однесува до напаѓачките опции, Адис Јаховиќ е повикан, но неговото доаѓање е неизвесно. Јаховиќ се соочува со одредени потешкотии, има болки во тетивата и наскоро ќе дознаеме дали ќе може да му се приклучи на тимот. Несторовски не е повикан од причина што во текот на оваа сезона има одиграно само 13 минути во Купот на Италија, но не значи дека нема да сметаме на него за идните активности, доколку влезе во натпреварувачки ритам“, наведе Милевски.
Македонија ѝ гостува на Италија на 24 март на „Ренцо Барбера“ стадионот во Палермо со почеток од 20:45 часот, а вториот натпревар, било финален бараж или пријателска, ќе го има на 29-ти во Порто или Коња.
Голмани:
Столе Димитриевски - Рајо Ваљекано (Шпанија)
Дамјан Шишковски - Докса (Кипар)
Кристијан Наумовски - Шкупи
Одбрана:
Стефан Ристовски - Динамо (Хрватска)
Дарко Велковски - Ријека (Хрватска)
Висар Муслиу - Инголштад (Германија)
Кире Ристевски - АЕЛ (Кипар)
Езџан Алиоски - Ал-Ахли (Саудиска Арабија)
Тодор Тодороски - Серед (Словачка)
Стефан Ашковски - Шепши (Романија)
Никола Серафимов - Залаегерсег (Унгарија)
Средина:
Аријан Адеми - Ријека (Хрватска)
Елиф Елмас - Наполи (Италија)
Енис Барди - Леванте (Шпанија)
Стефан Спировски - МТК (Унгарија)
Тихомир Костадинов - Пјаст (Полска)
Јани Атанасов - Хајдук (Хрватска)
Ердал Ракип - Малме (Шведска)
Бобан Николов - Шериф (Молдавија)
Давид Бабунски - Дебрецен (Унгарија)
Напаѓачи:
Адис Јаховиќ - Ѓозтепе (Турција)
Милан Ристовски - Спартак (Словачка)
Бојан Миовски - МТК (Унгарија)
Дарко Чурлинов - Шалке 04 (Германија)
Александар Трајковски - Ал-Фајха (Саудиска Арабија)
Валон Етеми - Истанбулспор (Турција)
Дориан Бабунски - Дебрецен (Унгарија)
Собирот на репрезентација е закажан за 20 март во 19:00 часот во хотел „Хилтон“ во Скопје.
Првиот тренинг е в понеделник во 19:00 часот на тренинг центарот „Петар Милошевски“ во Скопје. На 22 март во 17:00 часот со чартер лет репрезентацијата патува за Палермо.