Понекогаш најтешките натпревари се токму со најслабите противници. Тоа мислење го дели и фудбалскиот селектор Благоја Милевски во пресрет на квалификациите против Лихтенштајн и Германија.
Македонската фуидбалска репрезентација месецов има два натпревара во рамките на квалификациите за пласман на Мундијалот 2022 во Катар. Два натпревара различни како планина бидејќи играме против една од најслабите и против една од најдобрите европски репрезентации.
„Најбитен е натпреварот со Лихтенштајн. Нѐ очекува најтешкиот натпревар во досегашниот тек од квалификациите. Се работи за селекција која константно напредува во последните години. Не е истата селекција од пред десетина години. Имаат одличен тим, пред сѐ на колективно ниво, тоа го докажаа на натпреварите со Ерменија и Германија. Очекувам да го дадеме максимумот на тој натпревар, да дадеме сѐ од себе за да ги освоиме трите бода од тоа гостување. Фаворити сме, но тоа мора да го покажеме и на терен. Очекувам од моите фудбалери да бидат во подобра форма од натпреварите во септември. Сите се во тренажен и натпреварувачки ритам“, вели селекторот Милевски.
На осми овој месец прво гостуваме во Вадуц кај аутсајдерот Лихтенштајн кој во септрември оствари два пораза, но и го освои првиот бод откако ја изненади Ерменија на гости играјќи 1:1. Воедно, на домашен терен ѝ пружи страшен отпор на силната Германија која успеа да победи едвај со 2:0.
„Мора да бидеме подобри во реализацијата, тоа ни недостигаше во септември. Секој фудбалер треба да биде максимално сконцентриран, јас немам замерки за тоа што го пренесоа на терен од тоа што го баравме на последните натпревари. Не сакам да правам калкукации, мора да дадеме максимум, да го добиеме првиот дуел, а за сè останато ќе зборуваме подоцна“, додава селекторот.
По гостувањето во малата аплска држава, Македонија се враќа во Скопје каде на празникот 11-ти Октомври ја пречекуваме големата Германија.