Селекторот на македонската фудбалска репрезентрација немаше лесна задача да говори после еден таков висок пораз на домашен терен.
Грузија синоќа славеше убедлива победа над Македонија среде Скопје со 3:0 во рамките на 3. коло од Лигата на нации. Иако Македонија играше добро, на полувреме беше 0:0, имаше повеќе шанси, сепак Грузијците беа тие кои знаеја како топката се внесува во мрежата - тоа го сторија дури трипати и заслужено победија.
„Им честитам на Грузијците, одиграа добар натпревар“, почна селекторот Благоја Милевски. „Но, кога ќе загубиш вака тешко е да се најде причината за поразот. Три лоши реакции, иако со еден ваков противник да контролираш игра повеќе од 50 минути е нешто од што многу сум задоволен. После вториот гол паднавме и физички. Грузија е физички над нас. Нема што да им замерам на момците за тоа што во моментов го дадоа, а тоа е тоа што го видовме на терен. Ова е нашиот максимум во моментов. Жал ми е што кога доминиравме не дадовме гол“.
Селекторот повтори дека апетитите на неговата репрезентација се квалификациите за ЕУРО 2024, а не оваа Лига на нации која служи за воигрување на тимот.
„Од почеток на моето доаѓање реков дека главна цел се евроквалификациите за ЕУРО 2024 во Германија. Сѐ што поминавме досега во тие седум натпревари во мундијалските квалификации, баражите, оваа Лига на нации, сѐ е во функција на тоа. Мора да имаме увид во реалниот потенцијал со што сѐ располагаме, да знаеме на кого и колку можеме да сметаме во иднина“.
Следен натпревар за Мкаедонија, и воедно последен за овој натрупан јунски прозорец, е Гибралтар в недела, исто така во Скопје.
„Одиме понатаму, и в недела ќе пробаме да се консолидираме. Моментот во кој период се играат овие четири натпревари е надвор од секоја логика, но не можам, а да не бидам задоволен до тие 50 добро одиграни минути“.