Селекторот на македонската репрезентација до 21 година одлучи да повика 24 фудбалери за претстојните два квалификациски натпревари против силната Шпанија и аутсајдерот Фарски Острови.
Надежите ги продолжуваат квалификациите за пласман на У21 ЕУРО кое наредната година ќе се одржи во Унгарија и Словенија. Натпреварите требаше да продолжат во март, но поради пандемијата со коронавирусот беа одложени, а потоа и распоредот претрпе измени.
На 3 септември на „Тоше Проески“ арената од 18:45 часот младите македонски фудбалери ќе ја пречекаат првопласираната Шпанија, која е и фаворит за првото место во Групата 6, а потоа на осми гостуваме во Торсхавн кај Фарските Острови. Овој натпревар всушност требаше да се одигра уште во ноември, но тогаш поради замрзнатиот терен немаше услови за игра и беше одложен за во јуни кога поради пандемијата повторно се одложи.
„За овие натпрааври ќе ни недостасуваат, односно нема да сметаме на Јани Атанасов и Емил Абаз, фудбалери кои сѐ уште го немаат решено клупскиот статус, а поради повреда го немаме ниту Хајдари. Неизвесен е и настапот на Серафимов, но се надевам дека ќе се опорави од повредата, веќе е во тренажен процес и ќе биде во конкуренција за настап. Имаме неколку дебитанти, Алчевски, Тодоровски, Тошевски, Младеновски, Шеји и Фазлиу кои се надевам дека ќе ја зголемат конкуренцијата во тимот и ќе дадат придонес во нашата игра“, вели селекторот Благоја Милевски.
Голмани:
Ристо Јанков - Работнички
Давид Денковски - Брегалница
Марио Алчевски - Академија Пандев
Одбрана:
Агрон Руфати - Истра 1961 (Хрватска)
Есмин Личина - Македонија ЃП
Филип Антовски - Динамо II (Хрватска)
Тодор Тодороски - Осијек (Хрватска)
Ване Јованов - Академија Пандев
Никола Серафимов - Академија Пандев
Блертон Шеји - Струга
Марио Младеновски - Фремад А (Данска)
Средина:
Давор Здравковски - АЕЛ (Кипар)
Кристијан Ацковски - Брегалница
Енис Фазлагиќ - Жилина (Словачка)
Димитар Тодоровски - Работнички
Томче Гроздановски - ВиОН Злате Моравце (Словачка)
Ердон Даци - Коњаспор (Турција)
Напад:
Милан Ристовски - Ријека (Хрватска)
Дарко Чурлинов - Штутгарт (Германија)
Кристијан Трапановски - Академија Пандев
Давид Тошевски - Ростов (Русија)
Димитар Митровски - Спортинг (Португалија)
Марко Ѓорѓиевски - Раднички Пирот (Србија)
Лавдрим Фазлиу - Пелистер
„Поради промената во системот за натпреварување и начинот за пласман на ЕУРО (првопласираните по група и петте најдобро пласирани втори репрезентации обезбедуваат пласман), не ни преостанува ништо друго освен да се обидеме да освоиме колку што е можно повеќе бодови до крајот од квалификацискиот циклус. Шпанија е голем фаворит, не треба да се потенцира посебно нивниот квалитет, но јас се надевам дека ќе бидеме на нивото од првото полувреме од нашиот меѓусебен дуел во Шпанија и квалитетно ќе се спротивставиме“, изјави селекторот, пренесе ФФМ.
