Селекторот на македонската фудбалска репрезентација, Благоја Милевски, денеска одржа прес-конференција по повод објавувањето на списокот на фудбалери за последните средби од Лигата на нации против Латвија и Фарски Острови, кои ги играме на домашен терен.

Повикани се тројца дебитанти, голманот Марко Алчевски од Хапоел Ерусалим и дефанзивецот Бехар Фета од словенечки Домжале, и играчот од средниот ред Сефер Емини од дански Сендерјиске. Алчевски и Фета практично се прекомандувани од младата репрезентација. Од октомврискиот циклус недостасуваат Ахмет Иљазовски, Милан Илиевски и повредениот Тихомир Костадинов.
„Во ова издание секој бод и секој гол е важен. Секој натпревар го почнуваме со цел да победиме и да ги намалиме грешките кои што се неизоставен дел од секој дуел. Победа е императив на мечот со Латвија, но очекувам многу потежок натпревар од тој во Рига“, рече селекторот.
„Им посакувам добредојде на двајцата дебитанти кои заедно со Стојчевски и Илиевски, кој не е сега со нас, се приклучени од последната генерација на младата репрезентација до 21 година. Се надевам дека во иднина ќе се наметнат и ќе бидат важен дел од тимот кој се гради. Поминавме многу тежок период со минутажата на нашите играчи во клубовите. Имаме проблеми со повредени играчи и нема да сметаме на Тихомир Костадинов, а под знак прашалник се Висар Муслиу и Кристијан Трапановски. Свесни за важноста на овие два натпревара главна цел ни е да останеме на првата позиција“, рече Милевски.
Македонија двата натпревара ги игра дома. Прво на 14 ноември (четврток) ја пречекуваме Латвија, а три дена подоцна, на 17-ти (недела), играме против Фарски Острови.