Фудбалската асоцијација на Англија (ФА) објави дека размислува да ја прифати понудата од 800 милиони фунти за стадионот Вембли која денеска ја даде сопственикот на Фулам, Шахид Кан.
Шахид Кан е сопственик на Фулам, но и на НФЛ тимот Џексонвил Џегуарс и неговото богатство се проценува на околу 5,5-6 милијарди долари.
Потпретседателот на НФЛ, Марк Волер рече дека поседувањето на стадион во Лондон би бил од голема важност за оваа лига.
„Потенцијалната продажба на стадионот Вембли е нов силен знак на нашата посветеност кон Велика Британија и на нашата визија да пораснеме како глобален спорт. Оваа нова врска помеѓу НФЛ и Британија би овозможила поголема флексибилност во планирањето на НФЛ натпревари во Лондон“, изјави Волер.
Вембли е најголемиот стадион во Англија и има капацитет од 90.000 седишта. За неговата изградба беа потрошени 757 милиони фунти, а по реновирањето беше повторно отворен во 2007 година.
Во моментот Вембли го користат само репрезентацијата на Англија и Тотенхем, кој ги игра домашните натпревари на овој стадион додека чека да финишира изградбата на нивниот нов стадион.
