Напаѓачот на Наполи, Аркадиуш Милик, не стигна да ѝ се израдува на победата против Ливерпул од синоќешниот натпревар во Лигата на шампионите, бидејќи веднаш по натпреварот беше нападнат и ограбен.
Двајца напаѓачи на моторцикл, по кои полицијата и понатаму трага, му го пресекле патот на Милик, му се заканиле со огнено оружје и го ограбиле.
Синоќа Наполи на домашен терен го совлада тимот на Ливерпул со резултат 1:0, а Аркадиуш Милик имаше солиден натпревар, но не успеа да постигне погодок. Откако заврши славењето на победата, Милик се упатил кон неговиот дом, но набрзо двајцата напаѓачи му се приближиле и му впериле пиштол на главата со закана дека ќе го застрелаат доколку не им даде сѐ што има.
Нападот се случил околу 02:00 часот по полноќ, а во моментите на страв Полјакот им го предал часовникот вреден 20.000 евра и останатите работи кои успеал да ги најде низ џебовите, како пари, златни прстени и накит. Напаѓачите подоцна го напуштиле местото на настанот а Милик останал неповреден.
Ова не е прв случај во кој играчи на Наполи се мета на напаѓачи. Во 2013 година на истиот начин, со вперување пиштол на главата, беше ограбен Лоренцо Инсиње, играчот кој вчера го реши победникот со единствениот гол постигнат на натпреварот.