Славниот американски боксер Мајк Тајсон можеби ќе се врати во рингот и тоа во Австралија.
Поранешниот шампион во тешка категорија претходно кажа дека размислува да се врати во рингот, но за хуманитарни цели, па напорно тренира и е во добра форма.
Сега доби вистинска понуда за камбек и тоа за солиден хонорар.
Австралискиот промотер Брајан Аматруда изјави дека го исконтактирал агентот Макс Марксон и дека му понудил на Тајсон 1 милион долари за борба.
„Макс го донесе Тајсон во Австралија во 2012 година. Во добри односи се, главно бидејќи му помогна да добие виза за влез во земјата. Тоа е клучно“, изјави Аматруда.
Потенцијални противници на Тајсон би биле Бери Хол, Пол Гален и Сони Бил Вилијамс, познати имиња од австралиската рагби сцена кои претходно боксувале.
„Би направил настан во Мелбурн Арена каде би имало повеќе од 10.000 гледачи или на ‘Паркот на принцовите’ каде мечот меѓу Џеф Финик и Азума Нелсон го гледаа 30.000 луѓе. Тајсон има 53 години, но уште е големо име. Хол, Гален и Вилијамс би ја искористиле шансата да влезат во ринг со него. Тоа ќе биде нешто спектакуларно, не само борба, туку настан“, изјави промоторот за talkSPORT.
Тајсон стана најмладиот шампион во тешка категорија кога во 1986 година со само 20 години го победи Тревор Бербик. До пензионирањето има победено во 50 од 58 професионални борби. Боксерот ги импресионираше фановите со видео што неодамна го објави на социјалните мрежи на кое се гледа како напорно тренира.
