Бојан Миовски за малку ќе беше херој на синоќешниот квалификациски натпревар против Велс кога во судиското надополнување постигна гол кој сите го видоа како победнички. Но, дојде студен туш во последните секунди.
„Овој натпревар имаше премногу емоции поради тоа што се случи во Кочани. Стадионот беше полн. Знаевме против каква репрезентација игравме, 90% од играчите играат во Премиер лигата. Добро се браневме до последна минута и знаевме дека со борба ќе дојдеме до една шанса. Ја добивме во најпосакуваниот момент, во 90-тата минута. Навистина е жално да примиш гол во последните 10 секунди. Мислам дека ова може само повеќе да нѐ сплоти како репрезентација и да нѐ издигне. Ѝ благодарам на публиката што 90 минути нѐ бодреше, а ние како и секогаш, на секој натпревар понатаму ќе го оставаме срцето на терен“.
