Гувернерот на оваа американска сојузна држава потпиша преглог-закон со кој од знамето ќе се тргне амблемот на Конфедерацијата кој на него стои уште од пред 126 години.
„Ова за мене не е политичка одлука, туку свечена пригода која народот на Мисисипи ќе го зближи, ќе го помири и ќе направи да продолжи понатаму“, рече гувернерот Тејт Ривс.
Измената на знамето предвидува ново знаме кое ќе биде без симболи на Конфедерацијата, но ќе го задржи официјалниот слоган „In God We Trust“ (Веруваме во Бог) кој го користи државата, а не е на знамето. Граѓаните на референдум ќе се изјаснат за новото знаме. Доколку на референдумот не биде прифатено новото знаме, во текот на 2021 година комисијата за измена на знамето ќе даде нов предлог за дизајн.
Сегашното знаме на Мисисипи е усвоено во 1894 година и има три линии и тоа сина, бела и црвена, а во горниот агол го содржи симболот на Конфедеративните членки на Америка, односно непризнатата држава која ја изгубила Граѓанската војна каде била позната како Југот. Токму Југот се залагал за продолжување на ропството, а доминирала расната дискриминација во која белците биле примарната раса.
Знамето на двапати претрпувало мали промени, главно во нијасните на боите и во разделеноста на објектите.
Ова не е прв обид да се промени знамето на Мисисипи. Последен пат тоа се случи во 2001 година кога на референдум 64 проценти од граѓаните гласаа против промена на нивниот државен симбол.
Според потпишаниот предлог-закон, сегашното знаме мора во рок од 15 дена да биде тргнато од сите државни институции.
Инаку, конфедеративниот симбол кој стои на знамето на Мисисипи не е дел од знамето на Југот, туку е воено знаме на Армијата на Северна Вирџинија која се борела на страната на Југот, а денес е омилен симбол на приврзаниците на Конфедерацијата.
