Мистериозен метален монолит е откриен среде пустина во американската држава Јута. Забележан е од хеликоптерски екипаж чија задача била да ја преброи популацијата на муфлони.
Монолитот е висок меѓу 3 и 3,5 метри, забоден е во земја и сокриен меѓу карпи во пустината. Направен е од мазен темносив метал и не наликува на ништо слично со средината сочинета од црвени карпи, пренесе Independent.
Локалната ТВ-станица го интервјуираше пилотот Брет Хачингс, кој откри дека учествувал во откривањето на монолитот.
„Ова е најчудното нешто што сум го видел во текот на мојата кариера како пилот. Биологот кој беше во хеликоптерот е првиот што го забележа монолитот“, вели тој.
Според него, монолитот наликува на оној од познатиот филм на Стенли Кјубрик, „2001: A Space Odyssey – The Dawn of Man“.
„Мислам дека се работи за некаква уметничка инсталација. Веројатно авторот е обожавател на филмот или слично“. Вели Хачингс.
Доколку испадне дека навистина станува збор за уметничка инсталација, тоа не би било првпат некој уметник да направи уметничка инсталација во пустина, далеку од цивилизацијата. Минатата година германскиот уметник Макс Зиндентоф конструираше уметничка инсталација со седум звучници среде пустината Намиб, но уметникот одби да ја открие точната локација.