Египетскиот музеј во Каиро ги изложи мистериозните останки на маж мумифициран со вџасен израз на лицето, погребан во скап саркофаг без обележја, познат како „Мумијата во крик“.
Археолозите и египтолозите по 132 години ја решија мистеријата за оваа мумија што досега се нарекуваше „Непознат Е“.
Египетското Министерство за антиквитети соопшти дека ДНК анализите покажале дека се работи за синот на фараонот Рамзес Трети кој владеел од 1186 до 1155 година пред н.е.
Трагите на зачуваната мумија покажуваат дека човекот бил обесен и завиткан во овча кожа што Египќаните ја сметале за нечиста.
Папирусите од судските архиви покажуваат дека принцот Пентавер бил осуден на смрт со бесење поради вмешаност во завера за убиство на фараонот.
Тој ковал завера со мајка му Тија, втората жена на Рамзес Трети, да го убијат фараонот за кого не се знае точно дали бил убиен, но постојат индиции дека бил прободен во вратот.
При мумифицирање, се вадат внатрешните органи на трупот и телото се балсамира завиткано во ткаенина.
Меѓутоа, „Мумијата во крик“ била оставена да се исуши завиткана во овча кожа и погребана во скап саркофаг, но без никакви обележја, што укажува дека бил влијателна личност погребана без почести.