Volkswagen ја најави новата верзија на многу популарниот Golf GTI, кој ќе дебитира за време на трката Nurburgring 24 Hours на 31 мај.
Директорот на Фолксваген, Томас Шафер, на LinkedIn сподели тизер од „новиот“ моќен хечбек, а иако снимката е пикселирана, може да се заклучи дека автомобилот се трка низ зелениот пекол и ја „напаѓа“ Вртелешката (Carousel), најпознатата кривина на легендарна патека.
Малку се знае за овој Golf GTI, но евидентно е дека има малку поинаков преден браник во однос на моделот претставен пред неколку месеци. Тизерот завршува со натпис „50 години Golf“, што доведува до шпекулации дека ќе се вика Edition 50.
По повод 45-тиот роденден на Golf, Volkswagen го претстави GTI Clubsport 45 со нови аеродинамички компоненти, па слично сценарио е можно и со претстојната верзија на Golf.
Како што е познато, Mk8.5 Golf GTI беше претставен на крајот на јануари и е достапен исклучиво со 7-степен DSG менувач, што значи дека веќе не се нуди 6-степен мануелен менувач. Неговиот 2.0-литарски турбо-бензинец со четири цилиндри е изменет за да развие 265 КС во Европа.
Доколку новата верзија на Golf GTI е навистина Clubsport варијанта, моќта би можела да биде уште поголема. Golf GTI Clubsport 45 развива 296 КС и 400 Nm вртежен момент, така што новиот модел би можел да испорача повеќе од 300 КС.
Исто така, можно е VW да го нападне рекордот во Нирбургринг во категоријата за нов сериски автомобил со погон на предните тркала, круна што некогаш ја држеше Mk7 Golf GTI Clubsport S.
