Јубилејот 50 години од постоењето на Младинскиот културен центар во Скопје сепак ќе мине без лого откако по втор пат под притисок на јавноста организаторот го поништи избраниот победник.
„На почетокот од годината во која славиме еден многу значаен јубилеј – „50 години МКЦ“, распишавме конкурс за идејно-графичко решение за визуелно обликување на сите програми и активности што ќе следат низ целата 2022 година. Намерата беше најискрена: како и многу пати до сега, да ја вклучиме и јавноста, пред сѐ младите автори и преку формат на конкурс да избереме решение, кое сите заедно ќе нѐ обележи, поврзе, обедини и радува“, стои во воведот на денешното соопштение објавено од МКЦ.
Првично, МКЦ го одбра решението на Милан Димитриев, но потоа го поништи откако јавноста посочи дека е ископирано.
Димитриев беше дисквалификуван, а потоа второрангираниот Гоце Велески прогласен како нов победник.
Но, јавноста и во неговото решение најде плагијат. Така, од МКЦ објавија дека поради ваквиот развој на настаните целосно го поништуваат изборот, односно нема да се одбере лого.
„Со оглед на ситуацијата и двојбата што произлезе по објавување на прворангираните решенија, а со цел враќање на позитивната енергија и самиот јубилеј, програмскиот колегиум на МКЦ донесе одлука да не направи избор на идејно решение од апликациите и да го поништи конкурсот“.
„50 години МКЦ“ ќе се одбележува низ цела 2022 година со разни настани. Почна на 18 јануари со Роденденот на уметноста, а ќе заврши со Роденденот на МКЦ на 28 декември.