Македонската фудбалска репрезентација за играчи до 21 година го дозна распоредот по кој ќе брка пласман на младинскотото ЕУРО 2023.
Откако жрепката нѐ смести во навистина тешка група со Франција, Србија, Украина, Фарски Острови и Ерменија, УЕФА сега го одреди и календарот на натпревари и тоа со помош на жрепка.
Фортуната одлучи Македонија да почне со гостување кај Франција и тоа на 2 септември, а пет дена подоцна на домашен терен ја очекуваме соседна Србија.
Комплетен распоред на натпревари на македонската репрезентација:
- 02.09.2021 Франција - Македонија
- 07.09.2021 Македонија - Србија
- 07.10.2021 Фарски Острови - Македонија
- 12.10.2021 Ерменија - Македонија
- 11.11.2021 Македонија - Украина
- 16.11.2021 Македонија - Франција
- 24.03.2021 Србија - Македонија
- 29.03.2022 Македонија - Фарски Острови
- 01.06.2022 Македонија - Ерменија
- 07.06.2022 Украина - Македонија
Победниците од деветте групи, како и најдобрата второпласирана репрезентација, ќе обезбедат директен пласман на Европското првество кое во 2023 година ќе се одржи во Грузија и Романија, а останатите 8 второпласирани ќе играат бараж за да се добијат останатите 4 квалификанти.
Со оглед на тоа што квалификациите почнуваат во септември, иако имаше најави дека можеби ќе почнат уште сега во март, неизвесно е кој ќе ги предводи младите „Рисови“ бидејќи се очекува сегашниот селектор Благоја Милевски заслужено да стане селектор на сениорската репрезентација по завршувањето на ЕУРО 2020, до кога и гласи договорот на Игор Ангеловски кој веќе го достигна максимумот со репрезентацијата.
