Македонската фудбалска репрезентација за играчи до 21 година успеа во последните секунди да избегне пораз дома од Израел.
Гостите од Ветената земја го отворија резултатот во 21. минута кога Лиел Абада директно од корнер проба да постигне гол, Ристо Јанков успеа неако да одбрани, но на одбранетата топка налета Шај Елијас кој ја затресе македонската мрежа.
Израелците потоа ја контролираа играта не давајќи им на македонските фудбалети сериозно да се заканат.
Во 56. минута Израел имаше колосална шанса да го дуплира водството кога Димитар Митровски направи наивен прекршок за пенал над Самуел Броун. За наша среќа, Јанков одлично го прочита ударот на Ејлон Хаим Алмог и спречи нов гол.
Сепак, одбранетиот пенал не значеше и подобра игра на Македонија која до крајот имаше само јалови обиди за гол.
Израмнувањето стигна дури во последната минута од судиското надополнување која Јани Атанасов одлично изведе слободен удар од работ на шестнаесетникот и го совлада Асаф Цур.
И покрај избегнатиот пораз, ова реми е сепак кикс за младата репрезентација. И да бидеме на крајот втори во групата, сега веќе тешко веројатно дека ќе сме помеѓу оние пет најдобри второпласирани репрезенации кои обезбедуваат пласман на ЕУРО.
За Македонија настапија: Јанков; Антовски (82' Фазлиу), Личина, Стоименовски, Тодороски (75' Миовски); Атанасов, Здравковски (к) (75' Даци), Гроздановски (46' Илиевски); Чурлинов, Тошевски (46' Ѓорѓиевски), Митровски.