Македонската репрезентација со пораз во добра игра го отвори Европското првенство и ѝ зададе доста проблеми на фаворизираната Словенија.
Пред натпреварот одекна голем пех во нашиот табор кога селекторот-играч Кирил Лазаров поради повреда отпадна од комбинација и беше само во улога на селектор.
„Десниот бек се повреди во текот на вчерашниот ден на првиот официјален тренинг. По прегледите направени од нашиот медицински тим констатирано е дека се работи за повреда на спојот на два мускула на левата потколеница. Потребно е мирување од три недели“, објави РФМ попладнево.
И покрај тоа Македонија отвори одлично. Со фуриозна игра и одбрани на Томовски, Македонија поведе со 3:0, а потоа и со 4:1. Следуваше пад кога Словенците направија серија од 6-0 и поведоа со 7:4.
Од тој момент константно водеа, а нашите ракометари успеаја во три наврати да дојдат до израмнување, сите во првиот дел кој заврши со 13:10 во корист на Словенија.
Вториот дел беше доста шаренолик. Словенија водеше и со +5, Македонија дојде и до -1, но младоста и неискуството беа клучни за да не се дојде до поволен резултат.
Натпреварот завбрши со резултат од 27:25 во корист на Словенија.
Се чини дека оваа Словенија заслужи да биде совладана, но имаше среќа нашата репрезентација да биде казнета од неискуството на младите, но полетни ракометари.
Најдобар во нашиот табор беше голманот Мартин Томовски кој одлично го замени Митревски. Успеа 12 пати да им одбрани на Словенците и постојано ја враќаше во игра нашата репрезентација.
Најефикасен на паркетот беше Цветан Кузманоски со 8 голови, по 5 постигнаа Филип Кузмановски и Јуре Доленец, а по 4 Филип Талески и Блаж Благотиншек.
Од нашата група вечерва играат Данска и Црна Гора.
Во 2. коло, кое е на програмата в сабота, Македонија ќе се соочи со Црна Гора во истиот термин од 18 часот.
