Момче од Белград тврди дека неговиот татко починал бидејќи во болницата во Земун немало доволно респиратори. На социјалните мрежи се шири видеото од неговата емотивна изјава која ја пренесе српската телевизија N1.
Тој вели дека сè уште не го добил извештајот за смртта на неговиот татко и изјави дека властите се обидувале да го спречат да зборува за тоа. Ги обвини властите дека немало доволно респиратори во болницата во Земун.
Неговиот коментар „Тато ова е за тебе“ стана мотото на протестите во Белград.
„Тато ова е за тебе, тато многу те сакам, ова е за тебе и за мојот син којшто се роди скоро“, раскажува момчето низ солзи.
Секако, тамошните здравствени власти ја негираа оваа информација и уверуваат дека во Болницата Земун има 75 респиратори, а се користат само 30.
Во центарот на Белград вчера со часови траеја конфликтите меѓу полицијата и демонстрантите кои синоќа се собраа пред српското собрание откако претседателот Александар Вучиќ најави воведување полициски час поради влошената епидемиолошка ситуација. Тој денеска уште еднаш ќе се обрати до нацијата во 15 часот.
