Шпанскиот напаѓач изјави дека жали што го напуштил Јувентус и дека му недостига живеењето во Италија. Тој имаше и критики за времето поминато во Реал Мадрид, каде бил третиран „како дете“.
Алваро Мората помина две сезони во Јувентус, со кој освои две домашни титули и еднаш стигна до финалето на Лигата на шампионите, пред Реал Мадрид да го врати назад во своите редови со клаузулата која беше пропишана во неговиот договор.
Од Мадрид летово тој се пресели во Челзи, во трансфер вреден 60 милиони фунти, но Мората вели дека сѐ уште му недостасува Торино и играњето за Јувентус.
„Во Реал Мадрид ме третираа како дете, иако повеќе не бев дете. Кога заминав првиот пат бев млад и незрел, но кога се вратив веќе бев формиран како играч, но тие не ме третираа така“, изјави Мората.
„Никогаш не требаше да си заминам од Јувентус. Жена ми сака да живее во Шпанија, но јас сакам да живеам во Италија“, продолжи тој.
Мората рече и дека ја доживува Серија А како најтешка лига за напаѓачите, поради тактичката спремност на дефанзивците и тренерите.
„Во Шпанија доминира техниката, а во Италија тактичката спремност. Во Англија најважно е да си физички подготвен. Најтешка лига е Серија А поради организираноста на тимовите и големиот број добри дефанзивци“, заврши Мората.
Мората многупати отворено кажа дека го одбрал тимот на Челзи поради Антонио Конте, со кого има добра соработка во Челзи, иако на почетокот на сезоната не беше сметан како играч од првата постава.
