Поранешниот претседател на Интер смета дека не смее да се држи со сила играч доколку тој веќе се гледа во друг тим, додека спортскиот директор има различно гледање на работите.
Со сѐ поголемите шпекулации за преселбата на Лаутаро Мартинес во дресот на Браселона, со коментар се јави Масимо Морати, чие мислење е многу ценето во црно-синиот свет.
„Не може да држите некој кој наумил да биде на некое друго место. Тоа би го ставило во положба да остане безволно, или во друг случај, со поинаков мотив“, вели Морати за Sportmediaset.
Со тој став не се согласува спортскиот директор Пјеро Аузилио според кого Аргентинецот потпишал договор и евентуален трансфер може да се случи единствено според наведените услови.
„Има само еден начин според кој Мартинес би го напуштил Интер, а тоа е со плаќање на клаузулата. Клаузула која веќе сите ја знаат, нема потреба да ја криеме, и според која сите рокови и обврски се многу прецизно дефинирани. Тоа е клаузула која истекува на почетокот од јули така што нема многу време. И тоа е единствениот начин кој денес може Лаутаро да го однесе надвор од Интер“, вели Аузилио за Sky Italia.
Клаузулата за која зборува Аузилио гласи дека секој клуб што сака да го откупи договорот на Лаутаро без согласност на Интер треба да искешира 111 милиони евра во касата на клубот од Милано и тоа најдоцна до почетокот на јули. Потоа оваа клаузула престанува да важи и трансфер би бил можен единствено со преговори.