Непоразениот американски боксер во тешка категорија, Деонте Вајлдер, во сабота ќе боксува против предизвикувачот Доминик Бризил. Борбата ќе претставува кулминација на двегодишниот конфликт помеѓу двајцата боксери, а Вајлдер дополнително „ја подгреа“ атмосферата со сериозни закани до Бризил.
Бројни критики беа упатени на адресата на Вајлдер поради неговите коментари за противникот, во кои го советуваше дека „треба да си најде гробно место уште пред борбата“.
Деонте Вајлдер (40-0-1, 39 нокаути) реши да ги потсети љубителите на боксот на филмот „Rocky IV“, кога филмскиот лик Иван Драго рече за неговиот противник: „Ако умре – умре“. Американецот го направи тоа во негов стил, а конечната изјава звучеше морбидно, дури и повеќе отколку во филмот.
„Доминик (Бризил) го бараше ова, не јас. Тој ме побара, па ако смртта дојде по него – добро. Ова не е џентлменски спорт туку брутален спорт, често го кажувам тоа. Можете да прашате било кој доктор во светот и секој ќе ви каже дека не треба да ве удираат во главата, но сепак го правиме тоа“, рече Вајлдер.
Бризил и Вајлдер за првпат влегоа во конфликт пред две години, во Алабама, кога се случи и физичка пресметка помеѓу екипите на двајцата. Оттогаш и едниот и другиот имаа остри зборови за ривалот, но се чини дека овојпат Вајлдер ја премина линијата, повикувајќи на убиство на противникот во рингот.
„Ова е единствениот спорт во кој можеш да убиеш човек и да добиеш пари за тоа. Кога е легално, зошто да не го направам тоа? Неговиот живот е во опасност, бидејќи и понатаму се обидувам да имам убиство во рингот во моето резиме“, додаде Вајлдер.
Коментарите на Вајлдер доведоа до огромна дебата околу тоа дали медиумските провокации пред мечовите треба да имаат граница, со оглед на тоа што во боксот постои вистинска опасност дека еден од боксерите би можел да го убие другиот.