Московското метро е првото во светот каде возењето може да се плати со скенирање на лицата на патниците.
Москва стана првиот град во светот каде бесконтактната услуга за плаќање на возењето преку скенирање на лицето се користи во голем обем и важи за сите заинтересирани патници.
На некои линии на московското метро возењето со подземната железница од почетокот на септември може да се плати со користење на технологијата за препознавање лица FACE PAY.
Ваквата опција е воведена на последните пет линии од московското метро, објави руската новинска агенција Интерфакс.
Во тек е последната фаза на тестирање на системот, по што иновативната услуга ќе им биде достапна на сите патници во метрото.
Се очекува сите делови на метрото да се приклучат на системот Metro Face Pay на 15 октомври, што ќе овозможи побрзо и полесно плаќање билети, односно возење. Исто така, се испитува можноста за користење на истата услуга за надземен јавен превоз како градските автобуси, трамваи и тролејбуси.
Патниците кои плаќаат за билет со скенирање на лицето ќе минуваат низ посебни бариери опремени со специјални камери, кои ќе можат да го препознаат лицето и да го наплатат билетот преку картичка што е поврзана со лицето на корисникот. Сите подготовки пред користењето на услугата за плаќање со лице мора да се направат на специјална веб-страница на московското метро, каде што се внесуваат сите потребни податоци. Лицето се скенирано со специјални камери.
Во Москва во моментов има близу 200.000 безбедносни камери, од кои повеќето имаат можност да ги следат лицата, а околу 13.000 такви камери се инсталирани само во метро станиците.
Со прифаќањето на новиот систем за плаќање доаѓа голема одговорност за чување и обработка на биометриски податоци на милиони московјани и туристи, но претставниците на компанијата за метро тврдат дека сите безбедносни процедури се почитуваат на највисоко ниво и дека злоупотребата на податоците е практично невозможна.