Русија вчера соопшти дека нејзината главна вакцина против COVID-19, Спутник V, не предизвикува редок вид на згрутчувања на крвта кои се пријавени по употребата на две други вакцини конципирани со истата технологија.
„Комплетната анализа на несаканите ефекти за време на клиничките испитувања и за време на масовната вакцинација со Спутник V покажа дека нема случаи на церебрална венска тромбоза“, рекоа од Институтот за истражување „Гамалеја“, кој ја разви вакцината.
За вакцините на AstraZeneca и Johnson & Johnson во моментов постои сомневање дека предизвикале десетици случаи на овие многу ретки тромбови, од кои некои имаа смртен исход, па властите во неколку земји ја ограничија употребата на тие вакцини.
Овие две вакцини и Спутник V ја користат истата технологија на производство.
Сепак, институтот „Гамалеја“ истакна дека сите векторски вакцини се „различни и не можат директно да се споредуваат“.
Според овој извор, Спутник V е многу различен „во структурата и технологијата на производство“ од вакцините на AstraZeneca и Johnson & Johnson.