Иако самопрегледот на градите е многу едноставен и на него нема да потрошите повеќе од десет минути, загрижува фактот што многу жени никогаш немаат направено самопреглед или го прават многу нередовно.
Прегледот на градите дома може да ви го спаси животот, а еве како правилно да го изведете.
Самопрегледот најдобро се прави при крајот на циклусот, бидејќи тогаш хормоните имаат најмало влијание врз ткивото на дојката, а најлесно ќе го направите на следниот начин. Легнете, ставете перница под десното рамо и ставете ја десната рака зад глава. Со врвовите на прстите на левата рака правете кружни движења за да ја напипате десната дојка, а потоа и под пазувите.
Не брзајте, проверете темелно за да не пропуштите нешто. Потоа сменете ги рацете и прегледајте ја другата дојка и пазува на ист начин.
Прегледот можете да го направите и во стоечка положба. Застанете пред огледало со исправен грб и рацете испружени покрај телото. Внимателно прегледајте ги градите за какви било промени во формата или симетријата, како и за какви било чудни брчки и вдлабнатини, посветувајќи особено внимание на брадавиците. Исто така, лекарите препорачуваат кревање на градите за да можете лесно да ја споредите нивната симетрија.
Во случај да забележите некакви промени за време на домашниот преглед, веднаш контактирајте го вашиот лекар, кој ќе утврди за што се работи.
Важно е да се нагласи дека зачестеноста на прегледите на дојките зависи и од вашиот личен ризик. Имено, на жените со висок ризик од развој на рак на дојка им се препорачува еднаш годишно да прават ултразвук и мамографија на дојка почнувајќи од 30-годишна возраст, а на оние со просечно ниво на ризик им се препорачува да почнат да го прават тоа на возраст од 45 години.
