Светот одново се заљуби во Фреди Меркјури и „Квин“ со биографскиот филм „Bohemian Rhapsody“ што излезе лани, со Рами Малек во главната улога.
Малек, кој го играше ликот на екцентричниот, легендарен музичар и фронтмен на британскиот бенд, Фреди Меркјури, ги освои срцата на публиката и на критичарите и му донесе низа награди на филмот, меѓу кои и Оскар за неговата улога.
По вртоглавиот успех на филмот, веќе се зборува дека ќе се снима продолжение на приказната. Во интервју за Page Six, Руди Долезал, режисерот на повеќето видеоспотови на „Квин“, рече дека менаџерот на бендот Џим Бич е заинтересиран за продолжение на филмот.
„Сигурен сум дека планира продолжение во кое дејството ќе почне по настапот на хуманитарниот концерт Live Aid“, рече Долезал, додавајќи дека веќе на големо се дискутира за втор филм во семејството „Квин“.
Оваа информација е добар знак, со оглед на тоа дека Бич е продуцентот кој му вдахна живот на „Bohemian Rhapsody“. Филмот заработи 870 милиони долари на киноблагајните ширум светот, освои четири Оскари во февруари и ја оживеа популарноста на бендот воопшто.
Брајан Меј, легендарниот гитарист на „Квин“, претходно се изјасни дека постои веројатност за продолжување на приказната. Во интервју што го даде минатиот ноември за оригиналниот филм, тој рече: „Сметам дека Live Aid е добро место за да застане тука дејството на филмот. Којзнае, можеби ќе има продолжение.“
Додека обожавателите со нетрпение очекуваат потврда дека ќе има продолжение на филмот, Долезал во интервјуто за Page Six исто така откри дека пишува книга насловена „My Friend, Freddie“ и дека планира да ги објави неговите лични интервјуа со Меркјури во филм насловен „Freddie Mercury: In His Own Words.“
Дали вие го гледавте „Bohemian Rhapsody“? Дали би сакале филмот да има продолжение?