Култниот македонски бенд „Мугер Фугер“ на 23 мај, 2018 година ќе го промовира десеттиот, јубилеен, студиски албум насловен „Татко“, на платото пред МКЦ, со почеток во 21 часот.
Албумот „Татко“ содржи 10 песни, а се снимаше и миксаше во студио „Тра Ла Ла“, со продуцентот Мите Димовски.
На албумот работеа Сеад Хаџиќ – Сецко (гитара, мандочело), Огнен Мангаровски (синтисајзер, пијано ,бас гитара, гитара), Сашо Митревски (гитара), Никола Кузмановски (бас гитара), Огнен Златанов (гитара), Џано Куч (тапани и перкусии), како и Горан Трајкоски, Ристе Солунчев, Сашко Костов, Елена Христова, Снежана Стојчевска, Ристе Гоцев, Идриз Амети, Јон Ајдини и Џабир Дерала (вокали).
„Смислата на постоењето е тесно врзана во татковството бидејќи така се надживуваш себе си и на тој начин го продолжуваш твоето постоење. Јас во еден кус период станав татко и го изгубив својот татко, па на овој начин сакав да ја возвратам големата љубов која ја добивав“, изјави за Кајгана фронтменот Сецко во врска со инспирацијата за насловот на албумот.
Вечерта ќе ја отвори дуото Мухамед Ибрахими и Ратко Даутовски.
Новиот албум „Татко“ ќе може да се набави на промоцијата каде влезот е слободен.