Мундијалската топка Trionda на ФИФА ќе го снима контактот на секој играч

Глобалниот бренд Adidas подготвува нова официјална топка за Светското првенство во 2026 година. Засега го носи името Trionda, како синоним за тројцата коорганизатори, Канада, САД и Мексико.

Ќе биде во боите на сите три земји, бела со црвени, зелени и сини детали, а официјално ќе биде претставена на крајот на оваа година.

Она што го откри Marca се нови детали за Connected Ball Technology. Новата Trionda, како онаа за Мундијалот во Катар, ќе има голем број на сензори кои ќе го следат нејзиното движење и секој допир на играчите со неа. Ќе биде инсталиран најнов сензор за движење кој следи допири со брзина од 500 пати во секунда, работи на 500 херци и собира точни податоци за движењето на топката, кои се пренесуваат во ВАР просторијата.

Новата технологија ќе ги забрза одлуките за офсајд, топката надвор од границите на теренот итн... Повеќе информации за самата топка, технологијата и бројот на панели што ќе ги има ќе бидат објавени на промоцијата на топката.

На 31 јануари Adidas ја претстави официјалната топка за претстојниот Клупски мундијал на ФИФА кој ќе се одржи во јуни и јули. Таа исто така ја има технологијата Connected Ball Technology, но е во боите само на САД бидејќи овој Мундијал се одржува само во оваа земја.