Како што и вети, Жозе Мурињо така и направи. На прес-конференцијата синоќа рече дека ќе ги прекрши правилата и ќе направи фотка во чест на починатиот татко на македонскиот новинар, а сега тоа и се случи.
Прес-конференцијата на Тотенхем посветена на гостувањето во Скопје поради пресметката во Шкендија во рамките на 3. коло од квалификациите за Лига Европа имаше драматична завршница. Пресот заврши без новинарот Игор Александровиќ од ТВ Сонце да добие шанса да постави прашање, па Мурињо се врати за да го ислуша.
„Морам да ве прашам нешто во името на мојот татко“, почна Игор, а потоа му објасни за последната таткова желба, бидејќи тој не успеал да се сретне со неговиот идол Мурињо, неговиот син некогаш да го направи тоа.
„Ако ми дозволите да се сликам со вас, јас таа слика ќе ја урамам и ќе ја поставам на неговото вечно почивалиште. Доколку резултат е добар за вас, дали ќе ми дозволите да се сликам?“, праша новинарот.
„Сликата нема никаква врска со резултатот. Сликата е веќе направена. Ќе се сликаме. Пред натпреварот, или можеби во хотелот ако е полесно. Ако е по натпреварот, ќе биде по натпреварот, без разлика на резултатот“, одговори Мурињо.
Тотенхем синоќа пристигна во Скопје, а Игор си ја доби сликата со идолот на татко му. Ја искористи приликата и да му се заблагодари на Португалецот со книга за историјата на Македонија, а му го подари и старото знаме на Македонија, она со сонцето од Ајга.
Александровиќ е водител на емисијата „Полн Погодок“ на ТВ Сонце каде во утрешното издание ќе оди и прилог токму за овој несекојдневен настан.
