Екипата на Рома се подготвува за неделниот натпревар од Серија А против Каљари, а Corriere dello Sport открива зошто никој не смее да ги гледа тренинзите на „Волчицата“ во Тригорија.
Рома се обидува да се избори за позиција на табелата која води во Лигата на шампионите, но заостанува 9 бода зад четвртопласираната Аталанта. Минатонеделниот натпревар против Јувентус остави горчлива трага бидејќи римскиот клуб прокоцка предност од два гола и сега треба да се опорави на неделниот натпревар против Каљари на „Олимпико“.
Corriere dello Sport пишува дека тренерот на Рома, Жозе Мурињо, збеснал откако новинарите добиле информации за тактичките промени кои Специјалниот ги подготвил за натпреварот против Венеција во декември, па сега никој не смее да ги следи тренинзите на неговиот тим во Тригорија тренинг-центарот.
Мурињо се одлучи за тројца играчи во одбраната за да се соочи со Венеција и забележа пораз, еден од деветте сезонава.
„Волчицата“ сега тренира зад затворени врати, а тренерот се фокусира и на трансфер пазарот. Веќе е обезбедено доаѓањето на Ејнсли Мејтленд-Најлс и Сержиу Оливејра на позајмица до крајот на сезоната (првиот од Арсенал, вториот од Порто), а се следи и фудбалерот на Марсеј, Бубакар Камара, кому договорот му истекува на крајот од сезоната.
