Поранешниот тренер на Тотенхем смета дека клубот требало да го остави неговиот португалски сонародник и да му даде време наместо сега да почнува одново со нов стратег.
Жозе Мурињо ја стави во прашање одлуката на Тотенхем да направи тренерска смена после само 10 лигашки натпревари под водство на Нуну Еспириту Санту.
Лондонскиот клуб му врачи отказ на Португалецот после саботниот пораз дома од Манчестер Јунајтед и веќе во вторникот го назначи Антонио Конте за нов предводник.
„Нуну заврши одлична работа во Вулверхемптон, не за една година или за неколку месеци, туку за 4 или 5 години. Можам да кажам дека сега имаат многу добар тренер, но и претходно имаа многу добар“, смета Мурињо, мислење кое го даде говорејќи за Sky Italy.
Нуну застана на чело на лондонскиот клуб изминатово лето откако претходно четири сезони го предводеше просечниот Вулверхемптон со кого успеа да направи солидни резултати. Најпрво клубот го внесе во Премиер лигата уште во својата прва сезона, а потоа избори и пласман во групната фаза од Лига Европа.
Тотенхем сега повторно ќе мора да почнува од нула, со нов тренер кој има свои замисли и кој сигурно ќе бара и нови играчи уште во зимскиот преоден рок.
