Во пресрет на финалето на Конференциската лига, во кое неговата Рома игра против Феенорд, Жозе Мурињо изјави дека повеќе не е Специјалниот, прекар што си го даде сам и по кој беше познат долго време.
Португалскиот стручњак беше прашан пред мечот за трофејот дали ќе се случи уште една специјална приказна. „Тоа со прекарот Special One (Специјалниот) е минато“, одговори Мурињо.
„Кога созреваш мислиш многу повеќе за луѓето, а помалку за себе. Можам да го правам истото како и секој тренер и да се обидам да му помогнам на мојот тим. Не верувам во магични моменти. Не е работа на поединецот, туку на целиот тим, играчите, стручниот штаб. Дали новиот успех значи повеќе од минатиот? Да, но нема ништо специјално во тоа, ќе бидеме свои“, рече тој.
Мурињо е при крај на својата 22. тренерска сезона. Не знае кога ќе му заврши кариерата. Затоа, тој се присети на разговорот со сер Алекс Фергусон. Легендата на англискиот и светскиот фудбал го покани во својата канцеларија пред натпреварот од Лигата на шампионите во 2013 година, кога Манчестер Јунајтед играше против Реал Мадрид, каде што тогаш беше Мурињо.
„Фергусон ме покани во неговата канцеларија“
Фергусон како да го опомена со своите зборови.
„Пред натпреварот, Фергусон ме покани во неговата канцеларија. Го прашав: Шефе, што ќе се случи, дали нешто се менува со текот на годините? Тој рече: Заборави, ништо нема да се смени. Така е до последниот ден“, рече Мурињо и додаде:
„Затоа повторувам дека не можам да верувам дека имам 59 години. Не можам да верувам дека сум тренер 22 години. Тешко е да се каже кога ќе престанам бидејќи не можам ни да го замислам тоа. Страста не се менува“, рече тој.
„Конференциската лига е нашата Лига на шампиони. Сега сме на тоа ниво. Рома ја немаше оваа можност долго време. Сакаме да освоиме нешто бидејќи долго време не сме освоиле нешто“, заклучи Мурињо.