По две кола Мурињо има максимален ефект со својот нов клуб, а синоќа иако до полувреме се мачеше, Рома на крајот славеше убедлива победа.
Рома гостуваше на „Ареки“ стадионот во Салерно кај повратникот Салернитана која после 22 години е назад во италијанската елита. Иако доминираше, „Римската волчица“ не можеше да го пронајде патот до домашната мрежа и на полувреме се замина без голови.
Но, веднаш после паузата Лоренцо Пелегрини го отвори резултатот и потоа головите почнаа да се редат, па погодија и Жордан Верету, Тами Ејбрахам и повторно Пелегрини.
„Доминиравме на натпреварот, беше невозможно да не победиме“, почна Мурињо говорејќи за DAZN.
„Од првата минута игравме потполно смирено. Игрваме добро. Им реков на играчите дека позагрижен бев кога поведовме против Фиорентина и поопуштен кога тие ни израмнија. Сега, повторно доминиравме“.
„Некој можеби ќе рече дека не создадовме многу шанси во првиот дел, но ни на противникот не му дозволивме да создаде. Имавме целосна контрола и правевме што сакаме со топката, ја изморивме Салернитана, вртејќи ги наоколу и користејќи ги пас потезите кои ги вежбавме на тренинг“.
Мурињо цел натпревар го мина на работ од клупата бидејќи клупите на стадионот во Салерно се пола подземја.
Откако ја презеде Рома, Жозе Мурињо победи на сите четири натпревари, два во Серија А и два во Европа конференциската лига.
„Среќен сум што сум назад во Италија, во клуб кој има вистински навивачи, со луѓе кои се страствени. И мене ми беше потребно повторно да ги почувствувам овие чувства“, вели Португалецот.
„Кога ја погледнувам клупата, чувствувам дека ни е потребно повеќе искуство. Има клубови кои се посилни од нас, но навистина сум среќен што работам со овие момци и кога ќе играме против поголемите тимови, ќе играме за да победиме. Можеби тоа нема секогаш да ни успева, но нашиот менталитет не смее да се менува во зависност од противникот“, додава.
Серија А можеби ја напуштија големи имиња од играчите, како Лукаку и Роналдо, но затоа се вратија реномирани тренери. Освен Мурињо, назад во Калчото се Маурицио Сари, Макс Алегри и Лучано Спалети.
„Среќен сум што гледам дека се пробива нова генерација на тренери. Го чекам да се врати Дон Клаудио (Раниери, заб. на прев.), а Антонио (Конте, заб. на прев.) можеби размислува поинаку. Сепак, играчите се поважни од тренерите“.
После репрезентативната пауза предизвик за Мурињо и Рома ќе биде Сасуоло на домашен терен.
