Жозе Мурињо се расплака за време на интервју по синоќешниот триумф во првата сезона на Европа конференциската лига и вети дека нема да си замине од Рома по само една сезона.
„Ова ноќва не беше работа, ова беше историја. Моравме да испишеме историја. И испишавме. Останувам, нема дилеми за тоа“.
Првото историско финале во најновото клупско натпреварување на УЕФА се одигра синоќа на „Ер Албениа“ стадионот во Тирана, а го одлучи единствениот гол на натпреварот - дело на Николо Ѕаниоло. Поразен беше холандски Фејнорд.
„Многу работи ми минуваат низ глава. Многу работи истовремено“, велеше низ солзи Мурињо на микрофонот на Sky Sport Italia.
„Во Рома сум 11 месеци. Во моментот кога пристигнав сфатив што значи, тие чекаа за вакво нешто. Како што им кажав на момците во соблекувалната во Торино - го направивме она што требаше да го направиме, се квалификувавме за Лига Европа. Одработивме одлично сезонава“.
Рома никогаш порано немаше освоено европски куп бидејќи Купот на саемските градови, кој го освои во 1961 година, не беше во организација на УЕФА и не е признат како официјално натпреварување.
„Ова ќе остане во историјата на Рома, но и во мојата. Ми кажаа дека само јас, сер Алекс Фергусон и Џовани Трапатони имаме освојувано трофеи во три различни декади. Тоа прави да се чувтсвувам стар, но е убаво за мојата кариера“.
„Сега ќе заминам на одмор и ќе седам на плажа мислејќи на сето ова“, заврши Мурињо.
