Жозе Мурињо не би бил Специјалниот доколку не би знаел како да се извади од секоја ситуација. Овојпат најде зборови за да се оправда од синоќешната бламажа која неговата Рома ја доживеа во Удине.
Рома синоќа гостуваше на „Дачија Арена“ кај Удинезе каде замина по три бода и враќање на врвот на табелата. Но, „Волчицата“ уште по 5 минути игра имаше негатива кога по грешката на Рик Карсдорп резултатот го отвори Дестини Удоги. Рома до паузата не успеа да израмни, а и по полувремете не направи ништо на случајот. Лазар Самарџиќ со еврогол во 56. минута го дуплираше водството, за потоа Роберто Перејра и Санди Ловриќ да се погрижат за голема победа од 4:0.
„Моето објаснување е дека беше тежок натпревар, проблематичен противник кој знае како да игра вакви натпревари. Не смее да сме во негатива на ваков натпревар затоа што во таков случај тие се бранат навистина добро, одат во контри, можат да го контролираат темпото, прават тактички фаули, па ако имаш негатива против нив, веќе си во неволја“, објасни Мурињо говорејќи за DAZN.
„Имавме одлична шанса рано преку Дибала, кој, настрана резултатот, според мене беше наш најдобар играч на теренот. Секој пат кога Удинезе замина во контра, примавме гол. Нашите шанси беа една со глава над пречка и потенцијален пенал кој можеби беше и офсајд. Кога ќе загубиш со 4:0 не можеш да зборуваш за судиите, тоа е мое правило“, додаде португалскиот стратег.
„Ќе кажам само дека преферирам еден натпревар да го загубам со 4:0 отколку четири натпревари со по 1:0. Така, ние загубивме само 3 бода, што е подобро отколку 12. Тешко е за нас и за навивачите да се проголта ова, но таков е животот, имаме нов натпревар в четврток и продолжуваме напред“.
По 5 кола во Серија А римјаните имаат 10 бода (3 победи, 1 реми и 1 пораз) и се на делба на 3. место со Аталанта и Удинезе (Аталанта игра вечерва и може да го преземе врвот со победа).
Рома в четврток во рамките на 1. коло од Лига Европа гостува во Разград против Лудогорец.