Специјалниот избувна на прес откако по којзнае кој пат доби прашање зошто почнал со еден играч, а друг оставил на клупа. Обвини за нефер третман бидејќи такви прашања никогаш не им се поставуваат на останатите тренери.
На синоќешниот натпревар против Њукасл на гости Стивен Бергвајн почна од клупата, а влезе во игра при 1:1. Одлично му асистираше на Хари Кејн за 1:2, па на прес-конференцијата Мурињо беше запрашан зошто Холанѓанецот ретко е стартер.
„Видете, тоа е прашање кое обично ми го поставувате мене, но не и на Френк Лампард, Јирген Клоп, Пеп или на другите тренери од големите клубови кои имаат големи играчи. Кога Лампард го игра (Кристијан) Пулишич, не го прашувате зошто не го игра (Калум) Хадсон-Одои или слично. Кога Пеп Гуардиола ќе игра со некој друг, а Бернарду Силва е на клупа, никогаш не го прашувате за Бернарду Силва. Се чини дека јас сум единствениот кој мора да има 15 играчи во стартниот состав, или пак јас сум тој што нема право да има добри играчи на клупа“, се жали Мурињо.
„Ако денеска почнев со Бергвајн, сега ќе ме прашувавте што треба Лукас Моура да направи за да биде старетер или што треба Сон да направи. Ништо не треба да направат. Треба да бидат тимски играчи, а тимските играчи се играчи кои играат од почеток, седат на клупа, влегуваат во игра половина час пред крај, влегуваат за да одиграат и само минутка“.
„Колку пати Нуну (Ешпириту Санту) го има оставено (Адама) Траоре на клупата за да победи натпревар во последните 30 минути? Не го прашувате Нуну зошто Траоре е на клупа и зошто го игра (Диогу) Жота или (Даниел) Поденсе или (Леандер) Дендонкер. Само мене“.
